Mir leeën e kéiséckerfrëndleche Gaart un – informéiert eis iwwert Är Initiativen!

Einfach Aktiounen mat deenen dem Kéisécker séier gehollef ass – fir jiddweree vun eis, awer och fir d‘Gemengen:

Chemiefräie Gaart uleeën

Benotzt keng Chimie am Gaart! Schleekegëft an Insektizide vernichten dem Kéisécker seng Nahrungsgrondlag a kënnen hie krank maachen. Dëst gëllt och fir kënschtlechen Dünger. Duerfir ass e Biogaart optimal fir de Kéisécker.

Naturno Anlage gestalten

– Méit net alles mateneen, mee loosst ëmmer een Deel méi héich stoen. De Kéisécker freet sech iwwert dës Stopp.
– Leet amplaz vu gréngem Wues méi faarweg Wise mat Bléien un. Hei schléit een direkt méi Mécke mat enger Baatsch: Dës Wise brauchen net esou dacks geméit ze ginn, dat heescht de Kéisécker gëtt manner gestéiert, e kann sech verstoppen an duerch déi vill Bléien si méi Insekten do, déi hie friesse kann.

Duerchgängegkeet tëschent Liewensraim sécherstellen

Zénk sinn eng Barrière fir de Kéisécker, wou e net derduerch kënnt oder dran hänke bleift. Maacht duerfir kéiséckergerecht (13x13cm) Lächer an Dréit a Maueren (z.B. https://www.hedgehogstreet.org/).
Planzt z.B. eng Heck amplaz vun engem Zonk.

E flotten an originelle Kéisécker-Tunnel aus Holz kënnt Dir an eisem Shop bestellen (Link)

Fale vermeiden

E Weier oder eng Schwämm mat ze géien Uwänner sinn eng reegelrecht Fal fir de Kéisécker, well en hei net méi eraus kënnt an erdrénkt. Leet an deem Fall einfach eng Ramp un, iwwer déi de Kéisécker eraus klotere kann, wann en emol an d’Waasser fält.

An dësem Video gëtt erkläert, wéi Dir esou eng „Kéiseker-Trap“ selwer bastele kënnt: Natur Garten – basteln für den Igelschutz. 

Fir Plaze suergen, wou e sech ka verstoppen

De Kéisécker brauch awer och Méiglechkeete fir sech ze verstoppen. Op enger dréchener Plaz kann een e Stapel Holz, e Koup Äscht a Blieder opschichten, wou de Kéisécker kann drënner krauchen. Optimal ass e Kéiséckerhaus.

Opgepasst beim Asaz vu Maschinnen!

Vill Leit verloossen sech mëttlerweil op de Méiroboter fir hieren Wuess niddereg ze halen. Dëst ass net just mat Bléck op d’Insektestiewen problematesch – d’Beien an d’Paiperleke fanne kaum Bléien op esou engem “engleschen Wuess”, wëll d’Wëllkräider a Staude keng Zäit hunn Bleien ze maachen, geschweige denn auszesoomen. Ma de Méirobotter mëcht net nëmme mat de Wëllkréider kuerze Prozess: och kleng Déiere wéi de Kéiseker, Spannen, Eidechsen a Blannschlécher gi vum Méiroboter niddergemetzelt. Kéisékeren si besonnesch a Gefor, well déi Meirobotere oft och Nuets fueren, an d’Kéiséckeren nuetsaktiv Déiere sinn.
Wien net ganz op den „engelesche Wuess“ verzichte wëllt, kann op verschiddenen Plaze vu sengem Gaart Wiss stoe loossen, déi just 1-2 Mol am Joer (oder sougur just ee Joer iwwert dat anert) geméit gëtt. Dës dengt dann als Refuge fir Wellkräider a soumad als Nahrungsquell a Liewesraum fir Beien a Päiperleken.
A fir d’Meien ass d‘Meimaschin déi besser Optioun. Wann Dir dann trotzdeem net wëllt op Äre Méiroboter verzichten fir de Wuess op Deeler vun Ärem Gaart kuerz ze haalen, da schalt en zumindest just Daags iwwer tëscht 10h a 17h un. Do ass de Kéisécker manner aktiv a leeft soumat manner Gefor Ärem Méiroboter ze begéinen.
Och beim Asaz vun engem Fräischneider soll een oppassen, dass een net iertemlecherweis ee Kéisécker, deen ënnert der Heck oder engem Koup Blieder oder Äscht rascht, verletzt.

Feinde vum Kéisécker: Trapen, Drot, Trennwänn, „Netzer“

Et ass wichteg, datt de Kéisécker Passagen am Drot, an den Trennwänn a Maueren zum Noper huet. E brauch nämlech eng ganz Rei vu Gäert als Revéier fir ze iwwerliewen a muss hei hin an hier goe kënnen! An e kéiséckerfrëndleche Gaart gehéieren och keng Äerdbiernetzer oder aner Saache wou de Kéisécker kéint ëm d’Liewe kommen.

Manner Auto a lues fueren

Grousse Feind vum Kéisécker ass den Auto. Op senge Wanderungen nuets hëlt hien ëmmer aner Weeër, et weess een duerfir ni wou en iwwert d’Strooss geet.
Extra Kéisécker-Passagen oder Unterführunge bréngen also net vill. Eisem pickege Kolleg ass am Beschte gehollef, wann Dir op den Auto verzicht. Wann Dir awer nuets mam Auto ënnerwee sidd, da fuert lues (och wéinst aneren Déieren) a passt virun allem bei Plaze wou Hecken un d’Strooss stoussen, gutt op!